الخبيرة التربوية شريهان حسن: المنتسورى منهج تعليمى لتنمية مهارات الطفل
كتب: محمد محسن
تعد تربية الطفل فى زمن التكنولوجيا عملية انتحارية نظرا لتعدد وسائل التكنولوجيا التى تؤثر فى الاطفال وتغير من قناعتهم لذلك اعداد وتثقيف الاباء والامهات مهم من خلال التعرف على احدث النظريات التربوية ومن خلال حوارنا مع الخبيرة التربوية ومدربة التربية الايجابية شريهان حسن نتناول اهم الافكار الخاصة بتربية الاطفال وتنمية مهاراتهم من خلال خبراتها.
فى هذا المجال
كلمينا عن مجال عمللك وخبراتك؟
مجال عملى هو أستشارى تحفيز ومعلم تربية ايجابية للوالدين ومعلم تربية ايجابية للطفولة المبكرة عضو الجمعية الامريكية للتربية الايجابية وعضو المؤسسة العربية للتربية الايجابية
مجالى كاستشارى تحفيز بيؤهلنى لتقديم الدعم النفسى للشباب والاباء والامهات والمرأة بشكل عام
وتقديم كورسات تربية ايجابية للوالدين لمساعدتهم فى تربية الاطفال ومشاكل السلوك المختلفة لتعديلها
تقديم محاضرات فى فهم النفس وتنميتها بشكل عام وفى علم النفس الايجابى والتربية
عملت كمعلمة منتسورى لمدة سنتين بعد حصولى على دبلومة منتسورى لعمر0-6 سنوات واخرى من 6-9 سنوات وده كان سبب دخولى مجال التربية الايجابية لارتباطهم ببعض
كيف نتعايش نفسيا مع فيرس كورونا؟
الفيرس او اى خطر اوحاجة بتؤثر على الانسان فجأة بتسببله فى الاول عدم اتزان صدمة خضة روتينه وحياته بتختلف وبالتالى تصرفاته هتختلف ممكن يبقى بيتصرف بخوف رعب قلق من المجهول وده علاجه أولا أن تكون مركزيتى فى الدنيا ربنا يعنى ايه يعنى دايما يبقى عندى يقين أن اى حاجة بتحصل هى خير مهما كان ده مش واضح فى وقتها واتصالنا بربنا فى العبادات المختلفة وفى مختلف الاديان بيساعدنا يبقى عندنا صمود نفسى يعنى نقدر نواجه الاحداث ونبدأ نفكر بهدوء أكتر والحاجة التانية اننا نلبس نضارة الايجابية علشان نشوف ازاى نقدر نعدى الحدث ده نقدر نستفيد ازاى من الشغل والتعليم اونلاين نقدر نقرب من بعض ازاى كعيلة كل ده بيساعد جدا اننا نتغلب على الاثر النفسى للفيرس أو اى حدث تانى
ايه هي الخلطة السحرية لتربية الاطفال في زمن التكنولوجيا؟
أننا ناخد خيرها ونبعد عن شرها يعنى بكل بساطة اى حاجة بتزيد عن حدها تقلب لضدها يبقى لازم نقلل عدد الساعات نوفر حماية لاولادنا من المواقع الالكترونية الاباحية وده من خلال مراقبة الحسابات وده طبعل للسن الصغير وفى تطبيقات حاليا مخصصة للاطفال بس زى اليوتيوب كيدز نستفيد من المواقع المفيدة انها تسهل تعليمهم نزودهم بالعلم والثقافة الصح واخر حاجة لازم نشاط بدنى رياضة وتعامل اجتماعى مع اخد الاحتياطات طبعا فى زمن الكورونا
ايه معادلة النجاح لاى إنسان؟
هى مش ثابتة لكل انسان لان كل حد فينا بيشوف النجاح بطريقة لكن الاساس دايما تحديد الهدف والتخطيط تقسيمه خطوات صغيرة سهل تنفيذها علشان نكمل فيه والسعى والاصرار والصبر واليقين بالله
هل يؤثر محتوي التعليم علي مسيرة الانسان؟
أكيد جداااا لو أنا من أول سنوات التعليم الاولى قدرت اتعامل مع الذكاء الفطرى اللى الطفل بيتولد بيه ودخلت محتوى اساسه هو حواس الطفل واحترام قدرات عقله اللامحدودة بيختلف تماما وبيكون افضل من ان كل سنوات دراسته يكون فيها المحتوى ضعيف او يعتمد على الحفظ بيكون انسان مختلف تماما
هل النجاح علم ولاحظ؟
علم ومهارة وسعى ويقين
رسالة إلى الشباب
طور من مهاراتك وانت بتدرس بلاش سنين الدراسة تبقى مذاكرة المنهج واجازة وبس اقرأ كتير أشتغل فى الاجازة ومش شرط مجالك بس حيفرق معاك مهارات اجتماعية وتعامل مع الناس وخبرة فعلا لا تقدر بمال
كيف نقضي علي زحمة الاجهزة الالكترونية وخطورتها علينا نفسيا وجسديا
نخصصلها وقت حتى لو كانت مجال شغلنا نقفلها قبل النوم بساعتين نبعدها عن مكان النوم الرياضة حتى لو المشى الصلاة بتساعدنا نفرغ الشحنات اللى بتبقى فى أجسامنا منها بالسجود التواصل الحقيقى مع الناس والاصحاب والاهل
ازاي نتعامل مع الطفل المشاغب؟
هو على حسب احنا ليه بنوصفه بالمشاغب يعنى فى التربية الايجابية وفى مجالات التربية عامة وحتى فى علم النفس السلوك او التصرف اللى الطفل بيعمله بيبقى ناتج من شعور والشعور ده جى من فكرة فمثلا الطفل اللى مش بيسمع الكلام بلغتنا لما ام بتقولى كده فى استشارة بسألها يعنى ايه يعنى علطول رافض اى حاجة طيب انتى اصلا بتطلبى منه ايه ممكن تكون علشان مش راضى يلبس التيشرت اللى هى اختارته وده حقه انه يختاره طالما مش حاجة مؤذية ليه ايه المشكلة يختارها طالما انا موافقة بالمختصر أى طفل مشاغب زى ما بنوصفه بيبقى فى حاجة مضايقاه معاملة أهمال مش حاسس بأنه متشاف او موجود فبيعمل مشكلة علشان نشوفه ويحس بأمان فبكل بساطة لما تبقى فى سلوكيات مش مفهومة او غلط لازم نقدر نترجم الاول ايه اللى ورا السلوك او التصرف ده والا مش حوقفه حعالجه من الظاهر بس
كلميني عن منهج المنتسوري واثره في تنمية مهارات الطفل؟
منهج المنتسورى بيعتمد انه يدخل المعلومات للطفل من خلال استخدام الذكاء الفطرى وحواسه وفى المراحل اللى تكون مناسبة ليه وبيتعلم من خلال المنهج ده تنمية مهاراته الجسدية والعقلية يعنى بيتعلم فى المنهج ده تنمية عضلات ايده والاعتماد على نفسه بالكامل من اول انه بيأكل ويشرب ويلبس وينضف نفسه ومكانه ويحضر كمان الوجبات البسيطة وبيتعلم العلوم والجغرافيا والحساب واللغات منهج المنتسورى ليه خطوات وضوابط معينه نقدر نستخدمها ونطبقها على اى منهج تعليمى بيحتاج فقط تحضير من موجهة المنتسورى بتتسمى موجهة لان فى المنتسورى بتكون بس بترشد الطفل والطفل بيتعلم ذاتيا من الادوات والانشطة اللى بنحضرها لهدف تعليمى او منهج بنمشى عليه
الطفل اللى بينشأ او بيتعلم فى بيئة منتسورى بيكون منظم متزن قادر يعتمد على نفسه بالكامل مهاراته الاساسية وثقته بنفسه بتكون كبيرة جدا لان انشطة المنتسورى بتشعر الطفل بالانجاز انه قادر يكمل كل النشاط المطلوب لوحده وصح بدون تدخل من المعلمة زى الطرق العادية
وعلم الانياجرام ايه هو وعلاقته بتربية الاطفال؟
الانياجرام اساسه من العلوم الروحانية القديمة فى الاديان المختلفة اللى كان هدفها ان فى طرق مختلفة بتوصلنا للاله ده كان اساسه وكان مقتصر على رجال الدين المقريبن ولكن علما ءالنفس بدأوا يطبقوا فكرة الانياجرام وهى كلمة لاتينية معناها رسمة التسعة على النفس البشرية لانها من خلق الله وتعددت المدارس فى طريقة فهمها الاساس للانياجرام هى طريقة لفهم النفس البشرية وتحليلها وهى بكل بساطة بتقول اننا فينا 9 طبائع مختلفة وكل طابع هو شخصية وله دوافع وله نمط متكرر فى الفكر والعواطف وبالتالى التصرف بيكون فى طابع فيهم هو الاساسى فبيغلب على البقية وده اللى بيظهر فى تصرفات الانسان وقراراته طبعاممكن التسع طبائع يؤثوا اه وبيختلف تأثيرهم او مين الطابع اللى بيسيطر بناء على اللى بيحصل لنا فى الحياة والتربية والبيئة وحاجات كتير يمكن تغير شكل الطابع لكن بيكون موجود للسهولة هو علم فهم النفس البشرية علشان تطور نفسك يبقى لازم تتعلم عنها الاول تفهمها تفهم ايه اللى بيخليك تاخد القرار ده او ليه دايما شعور علطول جواك بالحزن او القلق او الخوف الانياجرام بيساعدك فى تحليل نفسك وفهمها ومساعدتك لتطوير ده ده للاباء والامهات والشباب علشان تكون انسان سوى وتربى اطفال اسوياء لازم تفهم نفسك الاول وتعلم ازاى تطورها وكمان لما حنفهم نفس الانسان بالطريقة دى يبقى حناخد بالنا من الرسايل اللى بنوجهها لاطفالنا واثرها ايه على تكوين شخصياتهم بعد كده
ايه مفهوم التربية الإيجابية؟
التربية الايجابية هو علم قائم على علم نفس أدلر هدفه الاساسى انك تقدر تعلم ابنك مهارات الحياة وتساعده يطور من نفسه من غير عقاب ولا ضرب بيحترم انسانية الطفل وانه فى ادوات فيه وطرق تساعدنى على تربية ابنى من غير زعيق ولا ضرب ولا تحطيم نفسية الطفل واننا ممكن نخطىء لاننا بشر والاخطاء فرصة للتعلم اسلوب تربية له جناحين الحزم والحنان ولا المربى الزايد فى الحنية بيساعد نمو الطفل ولا المربى القاسى كمان لازم نجمع الاتنين الحزم والحنان مع بعض
ازاي الانسان يتعافي من العلاقات الفاشلة او السامة؟
ده عنوان الكورس الجديد اللى بقدمه مع صديقتى كوتش أمل السراج
التعافى لازم الاول الانسان يعرف أنه أتأذى فعلا وان العلاقة دى مؤذية لان ناس كتير مش بتبقى عارفة ده اصلا وبتكمل فى علاقة بتاخد من طاقتها وروحها وقلبها
فالاول تعرف وتدرك أن دى علاقة مؤذية وده انك تعرف انواع العلاقات المؤذية او السامة وانت تحدد انت فى انهى نوع
الحاجة التانية انك لازم تتعلم تعيش من غير العلاقة دى فى بعض انواعها لما بنخرج من العلاقة بنكون زى الطفل اللى لسه اول مرة يتعلم المشى
الحاجة التالته نلجأ لمتخصص فى الرحلة دى لانها فعلا رحلة لازم حد يساعدك فيها علشان تقدر تفهم انت ايه اصلا اللى دخلك العلاقة دى وقبلت بيها ده بييبقى له دوافع نفسية أو اسباب نفسية عند الضحية نفسها للعلاقة دى
الحاجة الرابعة انك تبدأ تتعلم ازاى تقدر نفسك وتحترمها وتحط حدودك وتبدا من الاول علشان مش اى حد يخترق حدودك ولا قلبك ولا روحك ونفسك ويؤذيها مرة تانية
اخر حاجة نتوكل على الله ودى الحاجة الاولى والاخيرة اللى بتساعدنا كتير وبعدها ابدأ الرحلة الجديدة بعد ما فهمت نفسك وعرفت الاسباب وعرفت ازاى تحمى نفسك من علاقة مؤذية تانية
