الرئيسية
يارب بقلم ياسر بسيوني
بقلم ياسر بسيوني
ما بين تنهيدة والتانية
يدوبك جزء م الثانية
ودول أحياء ودول أموات
والفرق ما بين كلام وسكات
لسان أخرس وعين عميه
وقلب اتمنع من الدقات
دي ايد م العوزة ممدودة
وجتتها في الخلا مفرودة
وروح تلاقيها موجودة
في أماكن ياريتها محدودة
بتستني الصدقة والجودة
بتقولك دي الحياة فانية
يا كل دمعة محبوسة
ويا كل كتمة الأنفاس
ناس م الظلم محروسة
وناس بالجزم تنداس
ناس يغنيها ولو قرش
وناس ما يتمليلهاش كرش
وناس بتدعي رب العرش
تبات أجسامها مكسية
وأنا وانت وسلملي
على قبور هنندفن فيها
وعلى كفن مترين تملي
وناس تتمني حيط يداريها
وقصور ولا حد ساكن فيها
يا برقع الحيا مين خلعك
ويا قلوب موجوعة مين وجعك
ويا أرواح ميتة والاسم حيه
يارب أنت الكبير
ده الأمر صعب خطير
يملا قلوبنا الخير
وكفاية بينا قسيه
